Cortázar, de Jesús Marchamalo e Marc Torices: retrato dun enormísimo cronopio

05/06/2017

Komic Librería: Cortázar


Durante os últimos meses comentamos en repetidas ocasións o bo momento que está a atravesar a banda deseñada de carácter biográfico. Raro é o mes no que non apareza un ou varios títulos adicados a narrar a vida dalgunha figura salientable, personaxes relevantes en eidos tan distintos como a pintura, a política, as ciencias, o compromiso social ou a literatura, como é o caso que hoxe nos ocupa. Cortázar é un novo exemplo da bonanza na biografía gráfica que reúne ademais, dun xeito marabilloso, varias das nosas filias: un debuxante a quen seguimos dende hai tempo con atención (Marc Torices) emprega un xeito de expresión artística que nos fascina (a historieta) para reproducir os episodios vitais que o xornalista Jesús Marchamalo destaca do noso escritor preferido (Julio Cortázar). Pouco máis podíamos pedir.

 

Presentación de «A Alquitara», de Troubs, en Komic Librería

31/05/2017

Komic Librería: A alquitara


O xoves 1 de xuño, a partir das 18:30 horas, presentaremos en Komic Librería o cómic A Alquitara, un traballo do francés Troubs publicado en galego pola editorial coruñesa Figurandorecuerdo(s). Contaremos coa presenza de Rosa Espiñeira Pan (editora e tradutora) e de Séchu Sende (mestre e escritor), que profundarán nesta interesante obra.

 

A alquitara, de Troubs: testemuño dun oficio tradicional

30/05/2017

Komic Librería: A alquitara


A voluntariosa editora coruñesa Figurandorecuerdo(s) aposta, coma xa fixera hai dous anos, por traducir unha obra do francés Troubs á nosa lingua. Se daquela o título escollido fora Muuh! No prado das vacas (un bucólico retrato do noso animal totémico, un fermoso diálogo monologado entre o autor e as vacas), nesta ocasión con A alquitara a temática tampouco resulta descoñecida en terras galegas, pois xira arredor da figura do alquitareiro, un destilador ambulante posuídor dun alambique ou alquitara que percorre o rural a ofertar os seus servizos durante a estación da estila, é dicir, entre os meses de outubro e maio.

 

Un noruego en el Camino de Santiago, de Jason: a Ruta Xacobea en viñetas

19/05/2017

Komic Librería: Un noruego en el Camino de Santiago


John Arne Saeteroy, máis coñecido polo sobrenome de Jason, é un noruegués residente en Francia que se adica á ilustración e á historieta. A súa obra, única e inclasificable, resulta moi doada de identificar polo seu característico debuxo, unha liña clara minimalista protagonizada por animais antropomórficos, e posúe un aquel fascinante pola súa heteroxeneidade e por mesturar un certo desacougo existencial cun fino e irónico humor. Da súa man saíron títulos tan interesantes, diversos e recomendables como Espera…, Yo maté a Adolf Hitler, No me dejes nunca ou El último mosquetero. Hai dous anos, como celebración do seu cincuenta aniversario, decidiu poñerse as botas (literalmente) e camiñar dende San Jean-de-Pie-de-Port ata Compostela. Da súa experiencia naceu Un noruego en el Camino de Santiago, no cal recrea a súa viaxe, que vén de ser editado, coma o resto da súa obra, por Astiberri.

 

Komic Librería e o Día das Letras Galegas 2017

16/05/2017

Komic Librería: Día das Letras Galegas 2017


Mañá mércores, 17 de maio, celébrase o Día das Letras Galegas, a data que adicamos a lembrar e reivindicar a nosa lingua e a nosa literatura. Este día desprazaremos Komic Librería á Praza de Mazarelos de Santiago de Compostela, onde participaremos na «Romaría das Letras» organizada por Compostela Literaria: esperamos a vosa visita!

 

2/117