OS NOSOS TÍTULOS PREFERIDOS DE 2023

28/12/2023

alt


Chegan os derradeiros días do ano, un intre axeitado para voltar atrás e escoller as obras que consideramos máis salientables e recomendables entre aquelas editadas nos últimos doce meses.

Eliximos catorce títulos en total, sete de procendencia española e sete de autoría internacional, á espera, claro está, de publicar a nosa selección de banda deseñada galega. Eis as nosas escollas:



OBRAS ESPAÑOLAS:


LAS ALEGRES AVENTURAS DEL TRISTE PERRO CORNELIUS

Marc Torices
Apa-Apa

Unha impresionante edición para unha obra abraiante onde o autor catalán explora ao máximo o seu personaxe máis coñecido, un can antropomórfico e miñaxoia que non sabes se abrazar ou estrangular.  Unha novela gráfica inclasificable e monumental que amosa tamén a pericia gráfica de Torices.


altRONSON

César Sebastián
Autsaider

Outra bd cunha espectacular edición e un magnífico traballo gráfico, neste caso unha sorte de escolma de lembranzas de nenez nun tempo pasado. Fragmentos costumistas que se achegan ata o neorrealismo e cos que, malia as diferenzas temporais e espaciais, non é difícil que o público se sinta identificado.



altEL ABISMO DEL OLVIDO

Rodrigo Terrassa e Paco Roca
Astiberri

Sen dúbida, unha lectura necesaria.  A crónica da exhumación dunha fosa común de represaliados polo bando franquista no cemiterio valenciano de Paterna, feita cun tratamento xornalístico pero aproveitando ao máximo os recursos expresivos do cómic e deixando para o futuro un testemuño fundamental sobre a memoria histórica. 


alt

EL PÁJARO Y LA SERPIENTE

Borja González
Reservoir Books

O autor estremeño, flamante gañador do Premio Nacional de Cómic, volve enfeitizar co peche da súa triloxía “Las tres noches”, onde retoma o personaxe de Teresa tras The Black Holes e Grito Nocturno. Co seu estilo único, tanto gráfico como narrativo, Borja mantén o aquel enigmático e suxestivo que conquistou a lectores e lectoras de todo tipo.


alt

EL ENEMIGO DEL PUEBLO

Javi Rey
Planeta

Con mestría, precisión e acerto Javi Rey asina unha magnífica adaptación (e actualización) dunha obra teatral de Ibsen sobre os mecanismos do poder para manipular ás masas e o emprego dos medios de comunicación nesta innoble tarefa.  Máis de 140 anos despois da aparición do texto orixinal este continúa a ter plena vixencia, como demostran as páxinas deste álbum estupendamente debuxado e coloreado.


alt

CONTRITION

Carlos Portela e Keko
Norma

Dúas figuras históricas da historieta unen as súas forzas para nos presentar un thriller impactante e existencial, ambientado nunha vila habitada na súa meirande parte por ex convictos condenados por delictos sexuais,  que se cuestiona se é posible a redención.


alt

PLANETA

Ana Oncina
Planeta

A historia de amor entre unha parella de mozas en dous tempos distintos, o agradable presente e o inhóspito futuro, separados por unha difusa barreira onírica.  Cal é o tempo do soño e cal o da realidade? Un quebra cabezas magnificamente ensamblado no que a autora de Croqueta & Empanadilla confirma o seu talento e acada niveis extraordinarios no guión e no debuxo.


OBRAS INTERNACIONAIS:


alt

AL SON DE UN FADO

Nicolás Barral
Planeta

Na Lisboa de 1968 un médico, comodamente posicionado respecto á ditadura de Salazar, vai ver cuestionado o seu compromiso por unha serie de circunstancias.  Un relato costumista cun trasfondo histórico real  e un debuxo magnífico.


alt

LA FILÓSOFA, EL PERRO Y LA BODA

Bárbara Stock
Salamandra Graphics

Para nós unha das grandes sorpresas do ano, a biografía gráfica, feita cunha linguaxe sinxela e moi accesible, de Hiparquía, unha figura fascinante pero pouco coñecida. Posiblemente a primeira filósofa occidental e tamén unha pioneira do feminismo e de buscar e reivindicar o seu lugar do mundo.  


altLOS CINCO DE CAMBRIDGE

Valérie Lemaire e Olivier Neuray
Cartem

Cun estilo de “liña clara” ben clásico a parella autora de Los cosacos de Hitler volve de novo ao pasado para nos contar a historia do entramado de espías máis sorprendente do século XX, o grupo de cinco británicos que durante anos funcionaron como axentes dobres soviéticos no comezo da Guerra Fría.


alt

HYPERICON

Manuele Fior
Salamandra Graphics

Unha estudante italiana chega ao Berlín dos anos noventa para participar nunha exposición sobre Tutankamón. As súas vivencias entrelázanse co vivido por Howard Carter no achado da tumba do faraón, no ano 1923, dun xeito poético e fermoso.


alt

PENSS Y LOS PLIEGUES DEL MUNDO

Jérémie Moreau
Norma

Unha historia existencial ambientada na Prehistoria onde o protagonista, Penss, non se contenta con ser un cazador ou recolector e quere entender como funciona o mundo e a natureza.  Un relato cheo de poesía e reflexións interesantes co fermoso estilo gráfico dun autor que xa é un dos nosos preferidos. Aquí podedes atopar máis información sobre esta obra.


alt

LA BIBLIOMULA DE CÓRDOBA

Wilfrid Lupano e Léonard Cheminau
Norma

A finais do século X o visir Almanzor ordena queimar a meirande parte da riquísima e variada biblioteca de Córdoba, un dos epicentros do coñecemento da época.  Dous escribas escravos tentan salvar algúns dos libros coa axuda dun ladrón e dunha mula neste excelente relato de aventuras con agradables toques de humor e base histórica que nos leva a reflexionar sobre a intolerancia, a censura e a importancia da cultura.


alt

BAJO LOS GUIJARROS, LA PLAYA

Pascal Rabaté
Planeta

Un título sorprendente que nos leva ata a Francia de comezos dos sesenta e que mestura un relato iniciático de paso da mocidade á idade adulta cunha intriga de xénero negro, erotismo, loita de clases e consciencia social.  Todo servido co particular e único estilo do mestre Rabaté. Aquí atoparedes máis información sobre este título.




 

CINZA, de Manel Cráneo: a adaptación dun experto.

13/12/2023

alt


Falámosvos hoxe da chegada dunha das obras máis agardadas dos últimos anos, o novo traballo de Manel Cráneo, alguen que se tivesemos que definir en dúas palabras para nós serían “proximidade” e  “acción”.  Cómpre dicir que, alomenos no ámbito da bd galega, foi e segue a ser unha figura clave nos últimos vinte anos.  Dende a súa editora Demo foi quen de impulsar e visibilizar multitude de proxectos doutros autores, editar catálogos, montar exposicións, facer incursións no campo do audiovisual ou organizar as actividades de eventos como o “Viñetas desde o Atlántico” na edición deste 2023.

 

OS SUICIDANTES, de Diego Ameixeiras e Tomás Guerrero (Xerais): unha distopía compostelá.

01/12/2023

alt


Entre as numerosas novidades da bd galega que están a saír nestes últimos meses recibimos con especial ledicia a chegada d’Os Suicidantes, unha rechamante obra froito da confluencia de dúas voces ben inquedas e persoais como son a do xornalista, guionista e escritor Diego Ameixeiras e a do animador, ilustrador e historietista Tomás Guerrero. Para Diego esta novela gráfica representa o seu debut na banda deseñada, mentras que Tomás conta xa con varios títulos publicados en galego e máis en portugués entre os que sobresae O neto do homem mais sábio, a biografía gráfica de José Saramago. 

 

O PASO DO NOROESTE, de Xabier Queipo e Primitivo Marcos (Galaxia): aventuras en mares descoñecidos.

27/10/2023

alt


Presentámosvos hoxe unha das novidades máis salientables da bd galega neste 2023, a adaptación gráfica de O paso do Noroeste, a coñecida novela de Xavier Queipo que acadou o premio García Barros aló polo 1996. O mesmo autor afronta a difícil tarefa de converter o seu texto orixinal nun guión de cómic e lévalo ás viñetas coa inestimable e talentosa colaboración de Primitivo Marcos no debuxo.

 

BAJO LOS GUIJARROS, LA PLAYA, de Pascal Rabaté (Planeta): a descoberta da liberdade e do amor.

21/09/2023



Chega setembro e con el a fin desa paréntese das rutinas cotiás que son as vacacións. As acomodadas familias que veranean nunha pequena vila costeira bretona abandonan paseniñamente o seu retiro estival deixando baleiras as súas fermosas casas ao pé da praia.  Tan só Albert, Edouard e Francis, tres mozos de dezaoito anos a piques de comezar os estudos universitarios, fican uns días máis, sen a vixilancia dos seus pais, mentras se preparan para camiñar cara os prestixiosos futuros que auguran as súas tradicións familiares e posicións sociais.

 

2/149