Cómics recomendados para celebrar o Día do Libro 2021
Hoxe, 23 de abril, celebramos o Día do Libro, unha data especialmente sinalada e querida para aquelas persoas que amamos estes pequenos e máxicos artefactos cheos de historias, soños e coñecemento. Un día que festexaremos cunha ledicia, se cadra, maior do habitual por non ter podido facelo o ano pasado.
Queremos aproveitar tamén esta data para vos agradecer a todos vós, komiqueiros e komiqueiras, o voso apoio, confianza e fidelidade. Cómpre dicir que é algo que sempre temos en conta, pero do que fomos aínda máis conscientes nestes últimos meses. Graciñas.
Lembrámosvos así mesmo que durante toda a xornada de hoxe os libros terán un 10% de desconto sobre o seu prezo. Para que poidades aproveitar isto do mellor xeito deixámosvos tamén dez recomendacións publicadas nestes primeiros meses de 2021, unha selección variada e diversa tanto para o público adulto como para o infantil e xuvenil:
RECOMENDACIÓNS PARA PÚBLICO ADULTO
Revolución. 1-Libertad
Grouazel / Locard
Planeta
Poucas veces unha obra nos impresionara tanto como o fixo este fresco histórico realizado a catro mans e ambientado, obviamente, na Revolución Francesa. Imprescindible.
Oleg
Frederik Peeters
Astiberri
Nesta nova obra o autor suízo, un dos nosos preferidos, invéntase un alter ego que aproveita para reflexionar sobre o seu oficio de historietista, a vida e as grandes mudanzas sociais dos últimos anos. Coma sempre, unha delicia.
Grandes espacios
Catherine Meurisse
Impedimenta
Con moitísimo humor esta artista (que xa nos conquistara con La comedia literaria) amósanos a súa nenez e mocidade no rural onde impera, ao igual que na arte ou na literatura que vai coñecendo aos poucos, unha agradable sensación de liberdade.
A froita do coñecemento
Liv Strömqvist
Catroventos
Recibimos con emoción a tradución ao galego deste ensaio en formato gráfico, interesantísimo e necesario, sobre a historia da sexualidade feminina. Unha obra extensamente documentada, moi ben plantexada e que posúe un tremendo espírito crítico acompañado dun sutil humor.
Muhammad Ali. Kinsasa 1974
Abbas / JD Morvan / Rafael Ortiz
Diábolo
Outra obra editada en colaboración coa mítica axencia de fotografía Magnum, neste caso centrada en Abbas, o reporteiro que cubriu e tirou as imaxes máis relevantes do histórico combate de 1974 entre Muhammad Ali e George Foreman no Congo.
RECOMENDACIÓNS PARA PÚBLICO INFANTIL E XUVENIL
Raowl. La bella y el feo
Tebo
NuevoNueve
Unha divertidísima revisión das historias de fantasía, espada e bruxería, protagonizada por un afouto (e peludo) guerreiro.
Microalgas. O mar de Ardora
Xulia Pisón
Universidade da Coruña
A segunda entrega desta obra didáctica na cal, a través das aventuras dun grupo de mozas e mozos, aprendemos sobre as características das distintas familias de microalgas.
Tekis
Gómez
NubeOcho
As fascinantes peripecias de tres nenas inventoras e as marabillas que lles acontecen cando deciden deseñar un medio de transporte cara outros planetas.
Superman contra el Klan
Gene Luen Yang / Gurihiru
Hidra
Co protagonismo do Home de Aceiro os autores plantexan unha obra chea de humanidade e valores positivos onde o famoso superheroe loita contra o racismo.
Snapdragon
Kat Leyh
Astronave
Un magnífico relato protagonizado por unha adolescente no cal se mesturan maxia e realismo dun xeito máis que sorprendente.